04 Xan Adxudícase o servizo de redacción de proxecto, dirección facultativa e coordinación de seguridade e saúde para a creación dunha améndoa central no núcleo de Bertamiráns
Facer do núcleo de Bertamiráns un espazo atractivo, configurar un espazo de uso maioritariamente peonil ou crear espazos que favorezan o paseo eses son algúns dos obxectivos da humanización que o Concello de Ames quere levar a cabo no núcleo de Bertamiráns coa creación dunha améndoa central. Para conseguilo a Xunta de Goberno Local vén de adxudicar o servizo de redacción de proxecto, dirección facultativa e coordinación de seguridade e saúde de dito proxecto. Trátase dun paso máis nunha das actuacións máis ambiciosas que están recollida na EDUSI Impulsa Ames.
O obxectivo é crear un eixe que vertebre todo o núcleo urbano de Bertamiráns a través da peonalización de rúas e da creación dun espazo cidadá que favoreza o paseo, as actividades comerciais e de ocio sen o uso do vehículo particular. A delimitación da améndoa central de Bertamiráns e as actuacións proxectadas para o espazo viario formarán parte dunha estratexia integrada e integral que pretenderá incidir, de forma coordinada, en aspectos sociais, económicos e demográficos que contribúan a unha cidade máis competitiva, máis intelixente e máis equilibrada territorial, social e ambientalmente, permitindo así a todo o municipio avanzar cara a un futuro máis sostible.
Proxecto de humanización de Bertamiráns
A améndoa central de Bertamiráns medirá preto de 16 hectáreas e comprende o entorno da intersección da avenida da Maía coa avenida da Peregrina (oeste), a travesía da Peregrina e a avenida J.L. Azcárraga (norte), Camiño Novo, travesía do Lodeiro e paseo fluvial (este) e as rúas Agrelo e Alcalde Lorenzo (sur).
Con esta delimitación preténdese configurar un espazo de uso maioritariamente peonil que englobe importantes puntos de atracción da poboación como son a Casa Consistorial, o Pazo da Peregrina ou a praza da Maía. Ademais, permitirá o acceso a pé a outros puntos de interese coma o parque do Ameneiral, os centros educativos ou os establecementos comerciais. O ámbito tamén contará cunha importante bolsa de aparcamento público.
Deste xeito, preténdese que esta améndoa se converta nun gran espazo cidadá no que se dea prioridade aos percorridos a pé ou en bicicleta. As liñas xerais das actuacións propostas están encamiñadas ao incremento do espazo peonil e a implantación de sentidos únicos de circulación e a supresión de bandas de aparcamentos nas rúas do Ameneiral, rúa Entrerríos, Agrelo, travesía na confluencia coa avenida da Maía e coa travesía da Peregrina.
Revitalización dos núcleos de centralidade do municipio
Esta actuación está cofinanciada pola Unión Europea, a través do Fondo Europeo de Desarrollo Rexional (FEDER) nun 80%, dentro do Programa Operativo Plurirexional de España 2014-2020. Asemade enmárcase dentro da Estratexia de Desenvolvemento Urbano Sostible, EDUSI Impulsa Ames, polo que está cofinanciada polo Concello de Ames nun 20%.
Enmárcase na liña A8, “Programa para a revitalización e valorización urbana dos núcleos de centralidade do municipio”, da estratexia DUSI Impulsa Ames e que se sitúa dentro do ámbito do Programa Operativo Plurirrexional de España–FEDER. Ademais, está vinculado coa implementación doutras liñas de actuación que contribúen a alcanzar conxuntamente outro dos obxectivos estratéxicos da EDUSI Impulsa Ames como son: “Asegurar a anclaxe da poboación xuvenil do concello, poñendo á súa disposición espazos atractivos para o ocio e a cultura” dotando ao núcleo urbano de Bertamiráns de espazos que o fagan atractivo.
A concelleira de Deportes, Susana Señorís, responsable deste proxecto dentro da EDUSI Impulsa Ames, destaca que “xa demos o primeiro paso para que a creación dunha améndoa central no núcleo de Bertamiráns sexa unha realidade”. Ademais engade “teremos un espazo cidadán que favoreza o paseo, actividades comerciais e de lecer, espazos de centralidade no núcleo, que os faga atractivos para o paseo, as compras e o lecer veciñal, que sexa útil como punto de encontro e relación coa veciñanza e sexa, ademais, un motor comercial e de desfrute do concello”.
Humanización do Milladoiro
O Goberno municipal de Ames vén traballando tamén na humanización do outro gran núcleo do concello, tal e como é o caso do Milladoiro. Para poder acometer a necesaria actuación de mobilidade e sostenibilidade da avenida Rosalía de Castro o concello encargou un anteproxecto no que se recolle a redución de dous carrís na N-550 e a ampliación das beirarrúas e dunha mediana con máis árbores e vexetación. Para acometer este proxecto estase a traballar co Ministerio de Infraestruturas para intentar lograr o financiamento necesario, xa que estamos a falar dunha cantidade que supera os 8 millóns de euros.
Novas relacionadas
La Voz de Galicia: “Ames encarga el proyecto para humanizar Bertamiráns y busca fondos para el de O Milladoiro”
El Correo Gallego: “Estudio Técnico encargarase do deseño da nova améndoa peonil para Bertamiráns“