O Concello de Ames está inmerso no desenvolvemento das actuacións recollidas na EDUSI Impulsa Ames. Un dos proxectos que se vai executar é o programa Ames Emprega e Integra, que está dirixido a colectivos desfavorecidos do concello de Ames. Un dos ámbitos prioritarios de intervención do Concello de Ames é poñer en marcha actuacións en materia de prevención, detección e intervención da exclusión social.

Neste senso, o Concello de Ames decide poñer en marcha un programa de inserción laboral que responda ás actuais demandas sociais de dar cobertura a unha oferta formativa que incremente o índice de inserción laboral e social no municipio, como requisito imprescindible para poder fixar poboación no mesmo, axustándose aos intereses e necesidades dos colectivos ao que se dirixe e fomentando a cohesión social, a loita efectiva contra a discriminación e a erradicación da pobreza.

O programa de inserción laboral deriva dun estudo previo onde se determinan os colectivos desfavorecidos prioritarios, así como as súas demandas específicas de formación, acompañamento e práctica laboral, sendo unha das liñas de actuación con maior e máis inmediato efecto na reinserción laboral e que precisa dunha atención diferenciada das actuacións que en materia de políticas activa de emprego xa emprende o Concello.

Presentación do programa
Esta mañá realizouse a presentación do programa no salón de plenos da Casa do Concello. Os/as encargados de facer a presentación foron Juan Carlos Carreja, axente de desenvolvemento local e técnico responsable da xestión da EDUSI Impulsa Ames, así como María Lloves e Pablo Bello, técnicos municipais de inserción. A dito acto asistiron o alcalde, Blas García, a concelleira da unidade executora da EDUSI encargada deste proxecto, Ana Belén Paz, e outros/as concelleiros/as do goberno municipal.

Antes da presentación realizouse unha xuntanza de traballo na que participaron técnicos e responsables municipais, xunto con persoal da empresa Rafer, que é a adxudicataria do servizo de xestión e apoio técnico para desenvolver dito programa. Tamén participou persoal das entidades Fundación Secretariado Gitano, Cáritas Milladoiro, Plataforma polo Emprego e Cruz Vermella Santiago, co obxectivo de colaborar na difusión e inscrición dos usuarios e usuarias do programa.

O obxectivo de dita iniciativa é a inserción laboral das persoas participantes ou a mellora da sua empregabilidade. Levarase a cabo mediante a execución dun programa de inserción laboral derivado dun estudio realizado previamente que determinou os colectivos desfavorecidos e as súas demandas específicas de formación, acompañamento e practica laboral.

O programa está dirixido a persoas mozas (menores de 30 anos), con particular atención a aqueles con déficit de formación, mulleres, parados de longa duración, maiores de 45 anos, persoas con responsabilidades familiares, persoas con discapacidade, persoas en situación de exclusión social e persoas inmigrantes. Para participar é necesario residir no concello de Ames, ser demandante de emprego e estar nunha situación de busca activa de emprego.

O programa terá como ámbito territorial a totalidade do concello de Ames, priorizando os núcleos poboacionais do Milladoiro e de Bertamiráns como eixos presenciais do programa. As actividades do programa darán comezo coa captación de participantes ao longo do mes de maio e desenvolverase ata novembro deste ano. Para a captación de participantes farase un acto público a finais de maio ou comezos do mes de xuño.

Actividades a executar
1.- Orientación e asesoramento individualizado para a inserción socio laboral: itinerario formativo a realizar en función do perfil individual co obxectivo de mellorar a empregabilidade das persoas participantes.

2.- Formación transversal: preparar as persoas participantes en habilidades socio laborais e no proceso de busca de emprego, tanto por conta allea como por conta propia. Tamén se proporcionara as persoas que o necesiten unha formación básica en galego, competencias clave e preparación das probas da ESO.

3.- Formación sectorial: inclúense accións formativas e prácticas non laborais nos sectores nos que se detectaron maiores oportunidades de crecemento e creación de emprego. Colaboración co tecido empresarial do concello para buscar acordos para a realización de prácticas e a intermediación laboral.

4.-Plataforma de formación ocupacional en liña: que incluirá un catalogo de accións formativas que conte con, polo menos, 13 familias profesionais (as determinadas no programa) e un mínimo de 10 cursos de cada familia.

5.- Intermediación / prospección: para a procura de ofertas de emprego acordes ao perfil das persoas participantes, así como para a colaboración do tecido empresarial para a realización das prácticas.

6.- Evento final de presentación de resultados.

As accións do programa executaranse nas instalacións do centro coworking A Proa (O Milladoiro), Centro de Formación e Emprego do Concello de Ames (Aldea Nova), no Pazo da Peregrina (Bertamiráns) e noutros espazos municipais.

Procedemento para inscribirse
As inscricións pódense realizar chamando ao número de teléfono 674 594 843, enviando un correo electrónico ao enderezo ames.integra.emprega@gmail.com ou a través da páxina web de Ames Integra e Emprega.

A estratexia proposta co programa de inserción laboral de colectivos desfavorecidos no concello de Ames pon o foco de atención na necesidade de dotar ás persoas, especialmente poboación feminina e inmigrante, mocidade sen cualificación, e parados de longa duración en situación de desemprego, en procura de primeiro emprego ou en procesos de mellora de emprego, das competencias transversais/horizontais e competencias profesionais necesarias para poder consolidarse no mercado laboral, atendendo ás competencias en materia de tecnoloxías da información e comunicación.

Resultados que se pretenden alcanzar
Os resultados esperados que se pretenden alcanzar co presente servizo son:
• Integración social e laboral de persoas desempregadas, con especial atención a inmigrantes, mulleres e poboación moza.
• Incremento do índice de inserción laboral e social no municipio como requisito imprescindible para poder fixar poboación no mesmo.
• Fomento da competitividade e inclusión social, así como da igualdade entre homes e mulleres.

Esta actuación está cofinanciada pola Unión Europea a través do Fondo de Desenvolvemento Rexional (FEDER) cunha taxa de cofinanciamento do 80% dentro do Programa Operativo FEDER de Crecemento Sostible 2014/2020, enmarcado dentro da Estratexia de Desenvolvemento Urbano Sostible Impulsa Ames, de conformidade coa Resolución do 21 de xullo de 2017, da Secretaria de Estado de Orzamentos e Gastos, pola que se resolve a concesión definitiva de axudas da segunda convocatoria para a selección de estratexias de desenvolvemento urbano sostible e integrado.